எழு – விழி

முன்னேற்றம்	தந்திடுமே	முயற்சி;	அதனை
முறையாக	மேற்கொண்டால்	உயர்ச்சி;	நல்ல
எண்ணோட்டம்	வேண்டுமடா	உனக்கு;	இதுவே
எப்போதும்	உனைஉயர்த்தும்	கணக்கு;	அறிவுக்
கண்ணோட்டம்	கரையேற்றும்	பாரு!	ஆழ்ந்த
கருத்தோட்டம்	மதிப்புயுர்த்தும்	சீரு!	என்றும்
தன்னோட்டம்	தடம்மாறாப்	போக்கு;	முயன்று
தாங்கிப்பார்	வாழ்வுயரும்	வறுமை	நீங்கும்!
பாடுபடு	பலனுண்டு;	மண்ணை	வெட்டி
பகுத்துப்பார்	தங்கமொடு	வைரம்	உண்டு!
கேடுவிடு;	பிறர்வாழத்	தொண்டு	செய்நீ!
கேட்காத	போதுமிறை	அருள்கி	டைக்கும்!
ஆடுவிட	காடுகெடும்;	நாணல்	இட்டால்
ஆறுகெடும்;	இதுபோன்ற	செயல்கள்	நீக்கு!
ஈடுபடு;	ஊறுபடா	செயல்கள்	செய்நீ!
எப்போதும்	வாழ்வினிக்கும்	இன்பம்	தேங்கும்!
அறுவடைதான்	வேண்டுமெனில்	விதைக்க	வேண்டும்
அறுபடையான்	விதைவிதையான்	வினைதான்	தீர்ப்பான்!
உருப்படியாய்	ஓர்ந்துபார்	ஓலம்	வேண்டாம்
உன்னுழைப்பு	நேர்மைதான்	உயர்த்திக்	காட்டும்!
ஒருவிடையும்	காணாத	கேள்வி	உண்டா!
ஒவ்வொன்றாய்க்	கேட்டுப்பார்	நிகரே	நீதான்!
வரும்பொருளாய்	இறைவனத்தில்	ஏற்றம்	சேர்ப்பான்!
வற்றாத	வளவாழ்வு	அமையும்	காண்பாய்!
தொட்டால்தான்	செயல்துலங்கும்;	தூர	நின்று
துதிபாடிப்	பயனில்லை;	இனிப்பு	தன்னை
எட்டவைத்துப்	பார்த்திருந்தால்	சுவைதான்	உண்டா!
இப்போதே	எழுவிழிநீ	செயலை	நோக்கு!
அட்டியில்லை	வெற்றியினை	அடைந்தே	தீர்வாய்!
அதைத்தடுக்க	எவருண்டு	புதுமை	செய்நீ
பெட்டியிலே	அடைபட்டுக்	கிடந்தி	டாதே
புறப்படுநீ	சிறப்புடனே	ஏற்றம்	காண்பாய்!
மூழ்கினவன்	முத்தெடுப்பான்;	நூல்கள்	தன்னை
முறையாகப்	பயின்றவன்தான்	வெற்றி	காண்பான்
ஏழ்மையினைக்	தகர்த்தெறிநீ	ஏற்றம்	கொள்வாய்
இன்சொல்நற்	பண்புழைப்பு	கொள்வாய்	வெல்வாய்
ஆள்வதற்கு	ஆற்றல்கொள்;	ஆமை	யாநீ!
ஐந்தடங்கி	ஒடுங்கிடாதே;	அடிமை	நீக்கு
தாழ்ந்துழலும்	எண்ணத்தை	அறுத்து	வீசு
தலைநிமிரு;	எழுகதிராய்;	தயக்கம்	ஏனோ
கோபுரம்போல்	நீஉயரு;	கொள்கை	மாறாக்
குணக்குன்றாய்	வாழ்ந்திடுநீ;	பயிர்கள்	வாழ்த்தும்
காவிரிபோல்	வளங்கூட்டு;	வானம்	தந்த
கருணைமிகு,	மழையாகு,	எளியர்	ஏழை
ஆவியுள்ள	வரைமறவா	உதவி	செய்நீ
அரும்பசிக்கு	உணவளிநீ;	தெய்வம்	வாழ்த்தும்
தீயவர்கள்	உறவுவிடு;	நல்லோர்	நாடு
திருவருளும்	அறம்பொருளும்	சிறக்கும்	காண்பாய்