பெண் விழிப்பு

பெண்ணுக்கும்	ஆணுக்கும்	சமத்து	வந்தான்
பேசுகிறோம்	இந்நாளில்;	ஆனால்,	அந்நாள்
பெண்ணிழிவு	பேசியுமே	அடிமை	யாக்கி
பிழைகூறி	வழிமாறி	பழிகள்	தூற்றி
பெண்ணைப்போய்	பேயென்றும்	மாயம்	செய்யும்
பிசாசென்றும்	காட்டேரி	கூனி	என்றும்
கண்ணெதிரே	வருகின்ற	உரிமை	போக்கி
கடைக்கோடி	அடுப்படியில்	ஒதுக்கி	வைத்தார்!
பெண்ணுக்கு	வீட்டிலேயும்	வெளியி	லேயும்
பேசுவதற்கு	உரிமையிலை;	நாணம்	அச்சம்
பெண்ணிற்கு	மட்டுமென	கதவுப்	பக்கம்
போயொதுங்க;	உணர்வொடுங்க;	அடிமை	செய்தார்
வண்ணமலர்	வான்நிலவு	உயிரோ	வியம்
வடிவழகு	என்றேட்டில்	எழுதி	வைப்பார்!
பெண்ணடக்கி	ஆண்டிடுவார்;	ஆண்மை	என்பார்!
பேதமையால்	அழித்திட்டார்;	மடமை	காத்தார்!
பெண்ணின்றி	ஆணுக்கு	இன்பம்	ஏது
பிரசுகங்கள்,	பிரசவங்கள்	எவரால்	கிட்டும்
பெண்ணின்றி	ஆண்வர்க்கம்	தோன்றப்	போமோ
பிள்ளைவளர்க்	கின்றபாசம்	யாரின்	பாசம்;
பெண்வெறுக்கும்	ஜடாமுடிசேர்	முனிவர்	கூட
பெண்துறவி	சீடர்துணை	கொண்ட	துண்டு
கண்ணிரண்டு	ஆடவர்க்கு	உண்டு	என்றால்
கண்ஒன்று	பெண்ணென்று	கண்டார்	இன்று
வாளேந்தி	பரியேறி	போர்வென்	றாண்ட!
வரலாறு	பெண்ணுக்கும்	உண்டு;	நல்ல
கோலேந்தும்	வீரமங்கை	வேலு	நாச்சி
குன்றிலுயர்	மங்கம்மா	ஜான்ஸி	உண்டு
வேலேந்தி	ஆண்வர்க்கம்	அடிமை	கொண்ட
ஆரவல்லி	சூரவல்லி	அமுத	வல்லி
சூளேந்தி	ஆண்டதுவும்	உண்டு;	அந்த
துடிப்புத்தான்	பெண்ணுரிமை	விடிவின்	உச்சம்!
அடிமைப்பெண்	ணைச்சந்தைப்	பொருளாய்	விற்றார்
ஆடுமா	டொப்ப	இழிநிலையில்	வைத்தார்
கொடுமையிது	கொடுமையென	அண்ணல்	நபிதான்
கொடுஞ்செயலின்	வேரறுத்தார்	வெற்றி	கண்டார்
மிடிமையொடு	மடமையற	பெரியார்	காந்தி
பாரதிபா	ரதிதாசன்	கலைஞர்	அண்ணா
படித்தபகுத்	தறிவாளர்	திரண்டு	வெற்றிப்
படிமுகத்தில்	பெண்ணுயர்த்தி	வைத்தார்;	வென்றார்!
படிப்பதிலும்	நடிப்பதிலும்	விண்ணா	ராய்ந்து
பறப்பதிலும்	பட்டங்கள்	சட்டம்	ஆளத்
துடிப்பதிலும்	கல்விகேள்வி	வேலை	வாய்ப்பில்
தொய்வின்றி	விழிப்போடு	விளையாட்	டினிலும்
பிடிப்போடு	சமமாக	உயர்ந்தார்	பெண்கள்,
புதுப்புரட்சி	செய்கின்ற	காலம்	கண்டோம்!
அடிப்படையில்	ஆண்பெண்கள்	சமமென்	றாச்சு!
ஆர்ப்பரித்து	எழுந்ததுகாண்;	பெண்வி	ழிப்பு!