தந்தை பெரியார்

ஈரோட்டுப்	பாசறையாய்	இருளோட்டும்	ஒளிப்பிழம்பாய்
வேரோடு	புராணத்தை	வீழ்த்தவந்த	வீரர்யார்?
நால்வருண	குலாச்சாரம்	இதிகாச	ஐதிகத்தின்
வாலறுத்த	கொடுவாளாம்	வரலாற்று	நாயகர்யார்?
கடவுள்பெயர்	சொல்லிக்	கண்மூடி	வாழ்ந்தவரை
உடைவாளைக்	கையேந்த	ஒருங்கிணைத்த	தளபதியார்?
விட்டவிதி	தலையெழுத்து	கடவுள்செயல்	என்றவரை
தட்டிவிட்	டெழுப்பியே	தலைநிமிரச்	செய்தவர்யார்?
அரசாங்க	அதிகாரி	அருகினிலே	செல்வதற்கும்
அஞ்சிக்	கிடந்தவரை	அரசாளச்	செய்தவர்யார்?
ஜாதியெனும்	கொடுமையினைத்	தகர்த்தெறிந்து	சமன்செய்து
நீதியங்கே	நிலைத்தோங்க	நெத்தியடி	கொடுத்தவர்யார்?
ஆதியிலே	ஜாதியில்லை	பாதியிலே	வந்ததென்று
வாதிட்டு	வெற்றிகண்ட	வரலாற்றுத்	தலைமகன்யார்?
காட்டோரம்	வயலோரம்	கண்காணாத்	தூரத்தில்
வீடுகட்டித்	தனித்திருந்த	விதிமுறையைத்	தூளாக்கி
நாட்டுக்குள்	வீடுகட்டி	நலமனைத்தும்	பெற்றுயர
தீட்டுக்குத்	தீட்டுதந்த	திராவிடத்துப்	பெரியார்யார்?
பள்ளியிலே	கல்லூரிப்	படிப்பினிலே	இடந்தந்து
வல்லவராய்	உயர்ந்தோங்க	வழிகாட்டி	நின்றவர்யார்?
தீண்டாமை	எனும்தீமை	தீக்கிரையாய்	மாண்டிடவும்
மூடப்	பழக்கமெலாம்	மூள்நெருப்பில்	வெந்திடவும்
கொத்தடிமை	நிலையெல்லாம்	கூண்டோடு	அழிந்திடவும்
சித்தமெலாம்	பகுத்தறிவுச்	சிந்தனையாய்ப்	பூத்தவர்யார்?
எட்டாத	பாதாளம்	இருந்திட்ட	மக்களினை
எட்டுகிற	படிக்குயர்த்தி	ஏற்றமிகத்	தந்தவர்யார்?
சாத்திரத்தைக்	கோத்திரத்தைக்	காத்திருந்த	சூதரிடம்
சூத்திரனும்	சமமென்று	சூலுரைத்த	பகலவன்யார்?
ஓடுகிற	இரத்தத்தில்	உள்மூச்சில்	உணர்வுகளில்
வேற்றுமை	இல்லையென	விளக்கத்தைத்	தந்தவர்யார்?
வீட்டுக்குள்	பெண்பூட்டி	விலங்கிட்டு	அடிமையென
கூட்டுக்குள்	அடைத்தவரைக்	குலைநடுங்கச்	செய்தவர்யார்?
பெண்ணுக்குச்	சமஉரிமை	பேச்சுரிமை	தந்தவர்யார்?
கண்ணுக்குச்	சமமென்ற	கண்ணியத்தைத்	தந்தவர்யார்?
வீதியிலே	பொதுக்கூட்ட	மேடையிலே	பயமின்றி
பாதிப்பேர்	பெண்கள்வரப்	பாதை	திறந்தவர்யார்?
வறுமையிலே	வாழ்ந்தவர்கள்	வளமே	காண
வழிகாட்டி	நின்றவர்யார்?	மடமை	என்னும்
சிறுமையிலே	உழன்றோரை	அறிவு	ஊட்டி
சிந்திக்க	வைத்தவர்யார்?	சேரன்	சோழன்
பெருமையெலாம்	மறந்தார்க்கு	நினைவு	ஊட்டி
பீடுபெறச்	செய்தவர்யார்?	கல்வி	கேள்வி
நறுமணத்தை	அனைவரையும்	நுகரச்	செய்து
நாட்டினிலே	எழுச்சியினைத்	தந்த	வர்யார்?
பாம்பென்றும்	பாம்பைவிடக்	கொடிய	தென்னும்
பார்ப்பனரைத்	தாக்கியதார்?	பூநூல்	பற்றி
வீம்புபல	பேசியதார்?	பிள்ளை	யாரை
விபத்துக்கா	ளாக்கியதார்?	ராமர்	தன்னை
தேம்பியழ	விட்டதுயார்?	வேரோ	டாங்கே
தென்னைதனை	வீழ்த்தியதார்?	வைக்கம்	சென்று
தீண்டாமை	ஒழித்ததுயார்?	கள்ளுண்	பாரைத்
திருத்தியதார்	ஈவேரா	பெரியா	ரன்றோ!