அறந்தைக் கவிஞரின் பார்வையில்…..

பண்அம்	பலப்படுத்தும்	பாட்டரங்கம்	வந்திருக்கும்
என்அன்பிற்	குறியோரே!	ஏற்றமிகு	தமிழறிஞர்
பாகற்காக்	கவிஞன்நான்	பாவாடை	நானறியேன்!
(“பா” கற்காக்	கவிஞன்நான்	“பா”வாடை	நானறியேன்!)
மேகக்	கருக்கல்போல்	மென்துளிகள்	நான்தெளிப்பேன்
தொடையுண்டு	இலக்கணத்தில்	தொட்டதில்லை	நானதனை
அடியுண்டு	இலக்கணத்தில்	அடிபட்டுப்	பழக்கமில்லை
நேருண்டு	நிறையுண்டு	நெருங்கிநான்	சென்றதில்லை
காயுண்டு	கனியுண்டு	கடித்ததனைப்	பார்த்ததில்லை
கருவிளத்தைக்	கூவிளத்தைக்	காசுமலர்	நாள்பிறப்பைக்
காரிகை	அலங்காரம்	கண்டதில்லை	கேட்டதில்லை!
எழுத்தசையைச்	சீர்தளையை	எதுகையொடு	மோனைகளை
அழுத்தமுடன்	கற்றறியேன்;	ஆனாலும்	அவைப்பெரியீர்!
அழுத்தமுடன்	பாப்பாட	அரங்கேறி	வந்துவிட்டேன்
பழுத்தவனோ,	காயோ,	பார்த்தறிவ	துங்கள்கடன்
வெண்பா	கலிப்பா	விருத்தப்பா	சந்தப்பா
எந்தப்பா	வையும்நான்	ஏறிட்டுப்	பார்த்ததில்லை!
அப்பாவிற்	கப்பா	அருங்கவிதை	பாடியதால்
இப்போநான்	கவியரங்கில்	இயல்பாகப்	பாடவந்தேன்
குற்றங்	குறையிருந்தால்	கூறுங்கள்	திருந்துகிறேன்
கொற்றவனின்	முன்னே	குடிமகனாய்	வணங்குகிறேன்!

ஆண்ட	மொழிச்சிறப்பை	அழகுதமிழ்	மரபுதனை
மீண்டும்	நிலைநிறுத்த	மேடைக்கு	வந்தவரே!
வில்லெடுத்துப்	போர்தொடுக்கும்	வீர	மறவர்போல்
சொல்லெடுத்துப்	போர்தொடுக்கும்	சுழிமுனையைக்	கற்றவரே!
மாவரங்கம்	பலகண்ட	மாத்தமிழின்	சீர்கொண்ட
பாவரங்கத்	தின்தலைமைப்	பாங்குதனை	ஏற்றவரே!
இமைத்தவிழி	திறப்பதற்குள்	ஏழாயிரம்	கவிதை
அருந்தமிழி	லியற்றுமாற்றல்	அத்தனையும்	பெற்றவரே!
விட்டிழுத்த	மூச்சு	வெளியேறும்	முன்னாலே
கொட்டிக்	குவித்திடுவீர்	கோடிக்	கவிதைகளே!
தட்டி	எழுப்புவதில்	தமிழுணர்வை	ஊட்டுவதில்
திட்டமிட்டுப்	பாடுவதில்	திறன்மிகுந்த	பெருங்கவிக்கோ
முப்பழத்தின்	சுவைத்திறல்கள்	வாமுசே	துராமன்தன்
செப்பும்	கவிதையிலே	செரிந்திருக்கும்	காண்போமே!
மன்றத்தில்	மணியோசை	இவரின்	பேச்சு!
மணிமுடிதான்	தமிழுக்கு	இவரின்	ஆற்றல்!
குன்றத்து	விளக்காக	இலக்கி	யத்தேன்
குடங்குடமாய்	வார்த்தளிக்கும்	தமிழின்	வள்ளல்!
என்றைக்கும்	இவர்தொண்டு	தமிழுக்	குண்டு!
இவரறியா	நூலில்லை	தேர்ந்த	தேனீ!
கன்றுக்குத்	தாய்மடிதான்	சொர்க்கம்,	இங்கே
கவிப்பெருங்கோ	தான் எங்கள்	கவிதை	சொர்க்கம்!

பொங்குமெழில்	கவியரங்கை	ஆள	வந்த
புகழ்க்கவிஞர்	கணக்காயன்	கண்ம	தியன்
சங்கம்வளர்	தமிழ்மார்சல்	முருகன்	காரைக்
கிழாரோடு	அசோக்ராசு	தியாக	ராசன்
மங்காத	தமிழிலக்கு	வனாரின்	மைந்தர்
மானமிகு	திருவள்ளுவர்	சென்னை	ஆண்ட
தங்குபுகழ்	சாகணேசன்	ஆண்டவ	ரோடு
சவகர்லால்	ராஜேந்திரன்	டான்ஸ்ரீ	குமரன்
டத்தோஸ்ரீ	சாமிவேலு	செங்குட்	டுவன்
இரபியுதீன்	அயூப்போடு	சேக்அப்	துல்லா
டத்தோஆம்	நடராஜா	அருளின்	தந்தை
பேராயர்	எஸ்றாசற்	குணம்போன்	றோர்கள்
இத்தேசம்	எத்தேசம்	தமிழி	ருக்கோ
இவர்களங்கே	சிறந்திருப்பர்	பசீரலி	அப்பாஸ்
உத்தேசம்	பலநண்பர்	பெயரைச்	சொல்லி
உவந்துரைக்க	மனமுன்டு	நேரம்	இல்லை!

கவிமாமணி – உனது

கவி “மா” மணி!

அறந்தைத்திருமாறா! நீ என்ன

அன்னைத் தமிழின் ஆணிவேரா!

அறந்தாங்கி நிற்கிறாய் – உன்பாட்டு

வரந்தாங்கி நிற்கிறது!

சீற்றம் ஏட்டிலுண்டு – தமிழுக்கு

ஏற்றம் பாட்டிலுண்டு!

மரபுக் கவிதை – உனக்கு

உறவுக் கவிதையோ!

காவியத் தமிழோ – உன்கவிதை

ஓவியத் தமிழோ!

உன்னை வரவேற்கும் – வருங்கால

சென்னைத் திரையுலகம்!

வாழ்கநீ பல்லாண்டு –

வளமானதமிழ்ச் சொல்லாண்டு!

நிமிர்ந்து

நெஞ்சுயர்த்தி வாழ்த்தும்

கவிஞர். காசி முத்துமாணிக்கம்