Tag: 13

தெங்குகன்னல்	வாழைபலா	சேர்ந்ததெங்கள்	நாடு
சீருலாபோல்	காருலாவும்	சிறப்புமிகு	நாடு
மங்களஞ்சேர்	மஞ்சளிஞ்சி	மாங்கனிக	ளோடு
மணமிகுந்த	சந்தனமும்	அகில்விளையும்	நாடு
பொங்குபுனல்	பாயும்ஆறு	புகழ்மிகுந்த	நாடு
பொதிகையெனும்	மலைதழுவி	தென்றல்தரும்	நாடு
தட்டினாலும்	தங்கமெங்கும்	வெட்டினாலும்	வெள்ளி
பிளாட்டினமு	மிரும்புமலு	மினியமுள்ள	நாடு
தங்குபுகழ்	தாங்கிநிற்கும்	தனிச்சிறப்பு	நாடு
தாவும்அலை	மேவுகடல்	முத்துகொண்ட	நாடு
சிங்கமொத்த	வீரமக்கள்	சிறந்திருக்கும்	நாடு
சேரசோழ	பாண்டிமன்னர்	ஆண்டிருந்த	நாடு
கங்கையோடு	கடாரமீழம்	வெற்றிகொண்ட	நாடு
காரிமய	உச்சியிலே	கொடிபொறித்த	நாடு
கனகனையும்	விஜயனையும்	கல்சுமக்க	வைத்து
கண்ணகிக்குச்	சிலைவடித்த	காட்சிகண்ட	நாடு
வாரணங்கள்	போரடிக்க	சோறுடைத்த	நாடு
பாரதப்போர்	நடந்தபோதும்	பசியொழித்த	நாடு
முத்துமணி	பவளம்ஏலம்	மயில்தோகை	யோடு
மிதந்துகடல்	கடந்துதந்தம்	விற்றுவந்த	நாடு
எட்டுத்தொகை	பத்துப்பாட்	டுப்பதினெண்	கணக்கும்
இயலுமிசை	கூத்துகுறள்	இனிதுயர்ந்த	நாடு
கம்பரொட்டக்	கூத்தர்புக	ழேந்தியவ்வை	யோடு
கபிலரிளங்	கோவாழ்ந்த	புலவர்மிகு	நாடு
மொழிவளர்க்கச்	சங்கமாய்ந்த	மூத்ததமிழ்	நாடு
விழித்திருந்து	மொழிகாத்து	விருதுகொண்ட	நாடு
உலகமெல்லாம்	செம்மொழியாய்	உயர்ந்ததமிழ்	நாடு
உண்டுபல	மதமெனினும்	ஒன்றிவாழும்	நாடு
மாரியொத்த	பாரிஓரி	காரிவள்ளல்	நாடு
மீறிடாத	மனிதநேயம்	மிகுந்திருக்கும்	நாடு
பிச்சையாளர்	தொழுநோயாளி	ஆதரவில்	லாதார்
பெருமையுடன்	மகிழ்ந்துவாழ	வழிவகுத்த	நாடு
கஞ்சியூற்ற	ஆளிலாத	முதியோரினைத்	தாங்கி
காலமெலாம்	உதவித்தொகை	வழங்குகின்ற	நாடு
கண்கண்ணாடி	காற்செருப்பு	கருணையில்லம்	தந்து
காப்புறுதி	தந்துநோயைத்	தோற்கடித்த	நாடு
ஏழைவாழ	குடிசைமாற்றி	வீடுதரும்	நாடு
இரந்துஉண்டு	வாழ்வோரிலா	ஏற்றமிகு	நாடு
வேட்டிசேலை	துணியணிகள்	ஏழைகளுக்	கீந்து
வீட்டுக்கொரு	விளக்கெரிய	வழிவகுத்த	நாடு
ஒருரூபாய்	கிலோஅரிசி	உவந்துதரும்	நாடு
உணவளித்து	முட்டையுடன்	கல்விதரும்	நாடு
கிணற்றுக்கில	வசமின்சாரம்	கிடைக்கச்செயும்	நாடு
கேட்காமலே	விவசாயிதன்	கடன்தீர்க்கும்	நாடு
நாடில்லாத	நரிக்குறவர்	வீடுபெற்ற	நாடு
நாலுவகைப்	படிப்பறிவை	அவர்க்களித்த	நாடு
ஏழைகளும்	சிரித்திருக்க	ஏற்றதொண்டு	செய்தே
இறைவனையே	குடிசைக்குள்	இருக்கவிட்ட	நாடு
இந்தநாடு	“எங்கள்நாடு”	இனியதமிழ்	நாடு
ஏற்றமிக்க	நாடுவேறு	இதற்குஇல்லை	ஈடு!

2011 ஜனவரி 22-23 தேதியில் திருச்சி எம்.ஐ.இ.டி பொறியியல் கல்லூரியில் நடைபெற்ற உலகத்தமிழ்க் கவிஞர்கள் பேரவை – மற்றும் – தஞ்சை தமிழ்த்தாய் அறக்கட்டளையினர் இணைந்து ஆய்வுசெய்து தேர்ந்து கவிஞர் அறந்தைத் திருமாறனுக்கு கவிமாமணி விருது வழங்கினார்கள். ஆய்விற்கு எடுத்துக் கொண்ட கவிதை இது…